Galicia participa en NeXo xunto co British Council e o Wales Arts para impulsar as linguaxes musicais de raíz folk europea e latinoamericana

  Os galegos Xabier Díaz e Fernando Barroso incorpóranse a este laboratorio de creación musical colectiva no que tamén se integran artistas de Escocia, Gales, Arxentina e Uruguai

  O programa reunirá nove músicos dos cinco territorios nunha residencia artística que se desenvolverá en Bos Aires e culminará con dous espectáculos en Gales e en Escocia, este último no marco do festival Celtic Connections

  A Consellería de Cultura, Educación e Ordenación Universitaria participa a través da Agadic no proxecto, no que tamén colaboran Creative Scotland e a Fundación SGAE

Galicia participa en NeXo xunto co British Council e o Wales Arts para impulsar as linguaxes musicais de raíz folk europea e latinoamericana
[24/11/2015]
A Xunta de Galicia forma parte do programa NeXo, impulsado polo British Council e Wales Arts International como laboratorio de creación musical colectiva para a interacción cultural entre Europa e América a través da posta en común de tradicións e linguaxes musicais de Galicia, Gales, Escocia, Arxentina e Uruguai.

Ademais da Consellería de Cultura, Educación e Ordenación Universitaria, que se integra no proxecto mediante a Axencia Galega das Industrias Culturais (Agadic), tamén colaboran nesta iniciativa Creative Scotland (Reino Unido) e Fundación SGAE.
 
A participación artística en NeXo está representada por nove músicos destes territorios, que traballarán xuntos na busca da conexión entre as músicas europeas de raíz atlántica e a música latinoamericana. Farano durante unha experiencia de convivencia creativa, que comezará esta fin de semana en Bos Aires (Arxentina), coa finalidade de inspirar novos camiños para o desenvolvemento, a visibilidade e a promoción das identidades das músicas dos dous continentes.
 
Os contidos e obxectivos de NeXo foron presentados esta mañá en Santiago de Compostela nunha rolda de prensa na que participaron o secretario xeral de Cultura, Anxo Lorenzo; o director da Agadic, Jacobo Sutil; o director da SGAE-Zona Noroeste, Juan Carlos F. Fasero; e os músicos galegos implicados no programa, Xabier Díaz e Fernando Barroso, que ofreceron a interpretación en directo do tema ‘Xota de Lira’ en directo como remate do acto
 
‘Liña atlántica’
A presentación foi introducida polo director da Agadic, quen fixo mención de todas as entidades culturais internacionais presentes en NeXo, iniciativa que saudou como unha nova oportunidade de dar a coñecer e compartir a nosa música. 
 
Na súa intervención, o secretario xeral de Cultura expresou que NeXo incide na “liña atlántica” de intercambio cultural como un dos obxectivos prioritarios da Consellería e que se estende, ademais do musical, a outros ámbitos como o audiovisual ou o editorial. “É un módulo máis dentro desta engrenaxe, que continúa a dar proxectos de interese para a difusión da cultura galega e dos seus creadores e creadoras”, engadiu.
 
Anxo Lorenzo manifestou tamén o seu desexo de que este proxecto poida ter continuidade no tempo, de xeito que redunde na maior visualización exterior e na internacionalización da nosa cultura.   
 
Espectáculo posterior en Glasgow e Cardiff
O programa de NeXo está deseñado como un encontro e residencia artística que se desenvolverá en Bos Aires entre os próximos 28 de novembro ao 1 de decembro. Durante estes catro días, nove músicos dos cinco países crearán un repertorio que dialogará coas diversas linguaxes musicais que conforman a identidade de cada territorio. O resultado deste traballo presentarase nun espectáculo o día 21 de xaneiro no marco do célebre festival Celtic Connections, que se celebrará en Glasgow (Escocia), e o día 23 na cidade de Cardiff (Gales).
 
A dirección artística deste programa corre a cargo de Donald Shaw (Reino Unido), Fer Isella (Latinoamérica) e Rómulo Sanjurjo (Galicia), recoñecidos músicos e produtores. A produción xeral de NeXo é de JAU, empresa galega con sedes na Coruña e Bos Aires.
 
Representación galega
Respecto dos músicos, Galicia está representada por Fernando Barroso e Xabier Díaz. Fernando Barroso (guitarra e bouzouki) participa en numerosos proxectos do panorama folk de Galicia. Foi membro de Os Cempés e Assembly Point. Forma parte das bandas de Budiño e Riobó e ten producido diferentes traballos, tanto en solitario como co portugués Luis Peixoto, como ‘Pop’ e ‘Trim’, moi recoñecidos pola crítica en España e Portugal. Actualmente ultima un novo disco en solitario.
 
Pola súa banda, Xabier Díaz (voz e percusión tradicional) compaxina a súa faceta de músico coa investigación do folclore galego. Foi cantante en Nova Galega de Danza e formou parte do grupo Berrogüeto, co que obtivo varios premios. Acaba de presentar ‘The Tambourine Man’, un proxecto moi ambicioso de fusión de tradición e vangarda, con doce cantoras e percusionistas e un set de acordeón e zanfona.
 
Variedade instrumental
Os músicos dos demais territorios son tamén destacados representantes da música tradicional e de fusión nos seus respectivos contornos culturais. Desde Arxentina participan Fabián Martin (baixo) e María Elía (voz e piano). Por parte de Escocia integran NeXo Finlay MacDonald  (gaita e frautas) e Megan Henderson (voz e violín). Desde Uruguai incorporarase Fabián Miodownik  (percusión) e representando a Gales, Jordan Williams (voz e frautas) e Gwilym Rhys (voz, guitarra e mandolina).
 
Ademais da calidade dos compositores e intérpretes que conforman o elenco de artistas, destaca a variedade de estilos e instrumentos, garantindo así a coordinación entre os músicos, a súa complementariedade e a máxima excelencia no resultado final.