A Agadic contribúe á actividade dos cinco espazos da Rede Galega de Salas con 58 funcións escénicas ata xuño

  Un total de 28 compañías actuarán este semestre como parte desta programación, que se suma ás da Rede de Teatros e Auditorios e Rede Galega de Música ao Vivo para ofrecer unha carteleira de 500 actuacións

  Sala Gurugú e Teatro del Andamio da Coruña, Sala Ingrávida do Porriño, Fundación SGAE de Santiago e Teatro Ensalle de Vigo conforman este circuíto de distribución de espectáculos en escenarios de titularidade privada e capacidade reducida

 A Agadic contribúe á actividade dos cinco espazos da Rede Galega de Salas con 58 funcións escénicas ata xuño
[23/01/2016]
Cultura e Educación programará este primeiro semestre 58 representacións escénicas como parte da oferta cultural que achega a través da Rede Galega de Salas. Sala Gurugú e Teatro del Andamio da Coruña, Sala Ingrávida do Porriño, Fundación SGAE de Santiago e Teatro Ensalle de Vigo conforman este circuíto, financiado pola Agadic.

Contribúese deste xeito ao mantemento da actividade das salas escénicas de titularidade privada e capacidade reducida que, porén, reúnan os requirimentos para o desenvolvemento das actuacións de xeito profesional. Neste primeiro período de programación anual son 28 as compañías que dan forma á carteleira da Rede Galega de Salas, para a que se conta cun orzamento próximo aos 28.500 euros.
 
Propostas para público familiar
Este circuíto iniciou a súa actividade en 2007, ofrecendo dende entón un catálogo de propostas caracterizado pola multidisciplinariedade e no que foron cobrando maior peso as novas tendencias escénicas e os espectáculos especialmente dirixidos ao público infantil e familiar. De feito, este último tipo de propostas supón máis dun 65 por cento das actuacións contratadas no circuíto de xaneiro a xuño.
 
A meirande parte destes espectáculos preséntanse na Rede Galega de Salas da man de compañías galegas: A Illa dos Nenos, A Cova das Letras, A Xanela do Maxín, APP Creacións, Artello Teatro, Caramuxo Teatro, Danthea Teatro, Elefante Elegante, Floristería, Galitoon, Katarsis Educación e Teatro, Ningures Produción, Os Contos de Pablísimo, Teatro da Semente, Títeres Alakrán, Títeres Cachirulo, Trinketrinke Teatro e Xarope Tulú. En canto ás propostas teatrais para público adulto, a oferta galega está conformada por Aflera Producciones, Anómico Teatro, Ibuprofeno Teatro, Matrioshka Teatro, Teatro Ensalle e Xerpo Cultural.
 
A Rede Galega de Salas dá forma xunto á Rede Galega de Teatros e Auditorios e á Rede Galega de Música ao Vivo á carteleira de exhibición escénica e musical máis ampla de Galicia, que durante este semestre ofrecerá un total de 500 actuacións de teatro, música, danza, maxia e novo circo en 79 espazos de toda Galicia.
 
A programación das tres redes pode consultarse nos webs www.cultura.gal/gl/axenda e www.agadic.gal/Axenda.