Un coloquio sobre a figura de 'Foucellas' abre mañá a semana de representacións do último espectáculo de Talía no Salón Teatro

  Cándido Pazó, autor e director da montaxe, participará xunto á escritora Inma López Silva e ao historiador Luis Lamela na mesa redonda que terá lugar ás 20.30 horas

  Toño Casais, Dani Trillo, María Ordóñez e Artur Trillo interpretan a historia do famoso maquis galego, que poderá verse na sede do Centro Dramático Galego do xoves 12 ao domingo 15

Un coloquio sobre a figura de 'Foucellas' abre mañá a semana de representacións do último espectáculo de Talía no Salón Teatro
[09/05/2016]
A compañía Talía Teatro chega esta semana ao Salón Teatro co seu último espectáculo, ‘Foucellas’, que poderá verse en Santiago do xoves 12 ao domingo 15. Como actividade complementaria a estas representacións, a sede do Centro Dramático Galego (CDG) acollerá mañá martes, ás 20.30 h, un coloquio arredor do famoso maquis galego.

‘Foucellas, do mito á ficción’ é o título desta mesa redonda, na que participarán Cándido Pazó, autor e director da montaxe de Talía; Inma López Silva, escritora e crítica teatral; e Luis Lamela, historiador e autor do libro ‘Foucellas. El riguroso relato de la lucha antifranquista (1936-1952)’, publicado en 1992 por Edicións do Castro.
 
Catro funcións
O público terá así a oportunidade de se achegar á figura de Foucellas antes da posta en escena en Santiago do espectáculo homónimo, para o que Talía Teatro contou co apoio da Consellería de Cultura, Educación e Ordenación Universitaria a través da convocatoria 2015 de subvencións da Axencia Galega das Industrias Culturais (Agadic) á produción escénica. En Compostela, desenvolveranse un total de catro funcións: do xoves ao sábado, ás 20.30 horas, e o domingo, ás 18.00 horas.
 
Toño Casais, Dani Trillo, María Ordóñez e Artur Trillo dan vida á historia do coñecido maquis, na que ficción, mito e realidade se mesturan para nos propoñer unha reflexión sobre ese momento histórico. Tal e como explica a compañía, abórdase ademais “o pulso metafórico sobre un transo co que, privada ou colectivamente, ás veces nos enfrontamos: a xestión da esperanza e a administración da derrota”.
 
Dani Trillo asina tamén a escenografía e o deseño gráfico, mentres que Artur Trillo se encarga da distribución desta proposta, na que participan, así mesmo, Afonso Castro (iluminación), Martina Cambeiro (vestiario e maquillaxe), Manuel Riveiro (música), Auri Ferreiro (produción), Rubén Prieto (fotografía e vídeo) e Belén Pichel (axudante de dirección).
 
 
Venda de entradas
As entradas para asistir a estas catro funcións no Salón Teatro están xa á venda a través da web entradas.abanca.com e tamén se poderán mercar no despacho de billetes do Salón Teatro a partir do xoves desde dúas horas antes do comezo das representacións. O prezo é de 10 euros de xoves a sábado (cos descontos habituais) e de 5 euros o domingo, Día do Espectador.

-Dossier do espectáculo
-Venda de entradas
-Web de Talía Teatro