As estreas de 'Mimosas' e 'Decorado' maila actividade de Frida, Ladybug, Numax, Vaca Films e Zeitun centran a participación galega en Cannes

  O filme de Oliver Laxe protagonizará nove dos pases da Semana da Crítica, mentres que a nova curta de Alberto Vázquez presentarase na Quincena de Realizadores

  A Consellería de Cultura e Educación, a través da Agadic e en colaboración co Igape, apoia a presenza destas cinco empresas no ‘Marché du Film’, que arranca hoxe na cidade francesa consolidado como o principal mercado cinematográfico do mundo

As estreas de 'Mimosas' e 'Decorado' maila actividade de Frida, Ladybug, Numax, Vaca Films e Zeitun centran a participación galega en Cannes
[11/05/2016]
 Frida Films, Ladybug Films, Numax Distribución, Vaca Films e Zeitun Films participan desde hoxe no ‘Marché du Film’ do Festival de Cannes, a principal cita internacional para o sector cinematográfico. Este ano, ademais, o noso audiovisual terá un protagonismo especial neste encontro coas estreas dos últimos filmes de dous directores galegos.

Trátase da longametraxe ‘Mimosas’, de Oliver Laxe, que se presentará dentro da Semana da Crítica; e a curta de animación ‘Decorado’, de Alberto Vázquez, na Quincena de Realizadores.

A presenza galega neste importante festival conta co apoio da Consellería de Cultura, Educación e Ordenación Universitaria a través do programa de internacionalización e promoción do audiovisual galego que a Axencia Galega das Industrias Culturais (Agadic) vén desenvolvendo xunto ao Instituto Galego de Promoción Económica (Igape) en diferentes feiras internacionais de todo o mundo.
 
Recepción en colaboración con Galicia Calidade
No Festival de Cannes contarase, así mesmo, coa colaboración de Galicia Calidade na organización dunha recepción que terá lugar o vindeiro luns 16 no 3.14 Hôtel coincidindo coa estrea de ‘Mimosas’ e durante a que se degustarán produtos galegos. Producida por Zeitun Films e subvencionada pola Agadic, esta película supón o regreso a Cannes de Oliver Laxe seis anos despois de que obtivera o premio Fipresci da Quincena de Realizadores por ‘Todos vós sodes capitáns’, a súa ópera prima. Desta volta, presenta a súa segunda longametraxe na Semana da Crítica, sección que ofrecerá un total de nove pases da película.
 
A curtametraxe ‘Decorado’, dirixida polo coruñés Alberto Vázquez, estrearase o venres 20 no marco da Quincena de Realizadores, que acollerá tamén un segundo pase o sábado 21. A fita, producida por UniKo & Autour de Minuit coa participación de Alt Content e Abano Producións, acaba de ser seleccionada así mesmo para competir no importante festival de cine de animación de Annecy, tamén en Francia.

Misión empresarial
Pola súa banda, as cinco empresas integrantes da delegación galega ao ‘Marché du Film’ centrarán o seu traballo na cidade francesa no impulso ás vendas e na promoción exterior dos seus filmes, así como na procura de socios coprodutores e de todo tipo de oportunidades financeiras e de negocio para os seus produtos audiovisuais.
 
O ‘Marché du Film’ de Cannes supón unha oportunidade única para a compra, venda, financiamento, distribución e coprodución dos contidos que reúne. Anualmente congrega 20.000 profesionais, entre produtores, distribuidores de cine, axentes de vendas e programadores de festivais. Desde España desprázanse a esta cita, que se prolongará ata o vindeiro 20 de maio, arredor de 230 profesionais de 120 compañías.

-Festival de Cannes

-Mimosas
-Decorado