Os primeiros filmes de Jarmusch pechan a programación anual do CGAI tras 293 sesións e 461 títulos proxectados

  ‘Permanent vacation’ abre mañá o ciclo dedicado ao cineasta estadounidense, que terá a súa continuación á volta do Nadal

  ‘Extraños en el paraíso’, ‘Bajo el peso de la ley’ e ‘Mystery Train’ exhibiranse tamén nesta primeira quenda, mentres que en xaneiro poderán verse ‘Noche en la tierra’, ‘Dead man’ e ‘Gimme Danger’

Os primeiros filmes de Jarmusch pechan a programación anual do CGAI tras 293 sesións e 461 títulos proxectados
[14/12/2016]
A obra do cineasta de culto Jim Jarmusch centrará a recta final da programación de 2016 na sede do Centro Galego de Artes da Imaxe (CGAI-Filmoteca de Galicia) na Coruña, que rematará así o ano despois de ter proxectado 461 títulos (entre longas e curtametraxes) nun total de 293 sesións programadas.

Con catro dos primeiros filmes do realizador estadounidense arrancará unha retrospectiva que coincide coa chegada ás salas de cinema das súas películas ‘Paterson’ e ‘Gimme Danger’ e que terá continuidade tras o Nadal. A filmoteca galega achegaralles así aos espectadores unha panorámica da obra dunha das figuras indiscutibles do actual cinema independente.
 
O ciclo dará comezo mañá con ‘Permanent Vacation’ (1980), a súa ópera prima, á que seguirá o venres 16 ‘Extraños en el paraíso’ (1984), coa que Jarmusch obtivo a Cámara de Ouro de Cannes, o Leopardo de Ouro de Locarno e o premio especial do xurado de Sundance, entre outros recoñecementos.
 
Na semana de Nadal, poderán verse no CGAI outras dous fitas indispensables na súa filmografía: ‘Bajo el peso de la ley (1986) o xoves 22 e ‘Mystery Train’ (1989) o venres 23. Todos os filmes do ciclo proxectaranse en sesión dobre, ás 18.00 e ás 20.30 horas.
 
Xa en xaneiro, será a quenda de ‘Noche en la tierra’ (1991) o día 11, ‘Dead man’ (1995) o día 12 e ‘Gimme danger’ (2016), o seu recente documental sobre o músico Iggy Pop e a súa banda The Stooges, o día 13.
 
Vixésimo quinto aniversario
Con Jim Jarmusch concluirá unha programación na que o Centro Galego de Artes da Imaxe conmemorou os seus 25 anos de historia a prol da recuperación, conservación e difusión do noso patrimonio fílmico e fotográfico, así como da promoción entre a sociedade galega dun maior coñecemento do cinema e das artes da imaxe en xeral.
 
En 2016 o CGAI recibiu a visita, entre outros, de cineastas como Birgit Hein, Sergio Oksman, Charles Burnett, José Luis Guerin ou Camilo Restrepo, ademais de afondar na obra de Pere Portabella, de Chantal Akerman, de Abderrahmane Sissako ou de todo un clásico como Jean Renoir. Entre os ciclos temáticos, abordáronse os novos cinemas da antiga Iugoslavia, as orixes e evolución da vangarda norteamericana, o cinema español independente, a corrente postpunk no Reino Unido, o documental revolucionario en Cuba ou a historia da animación en España.
 
Ademais, aos apartados xa habituais da programación como Off Galicia, CGAI Júnior, Fóra de Serie ou Desencadres, sumouse este ano unha nova sección que, baixo o epígrafe ‘Contextos’, confronta destacados filmes actuais con outros títulos clásicos e contemporáneos desde moi diferentes puntos de vista.
 
Continuouse tamén co labor pedagóxico a través de Cinema en Curso, así como coas extensións da programación do CGAI en Ourense e Vigo, mediante acordos cos cineclubs Padre Feijoo e Lumière, e coas colaboración con festivais galegos como Play-Doc, (S8), FKM, Curtocircuíto e OUFF, entre outras actividades.

-CGAI