Cultura e Dos Acordes recuperan o repertorio para piano do compositor histórico Juan Montes

  O primeiro volume das ‘Obras para piano’ do autor lucense publícase nunha edición crítica a cargo de Joám Trillo, cun estudo introdutorio de Carlos Villanueva

  A obra presentarase o 15 de decembro no CGAC e o día 16 na Casa do Saber de Lugo, ás 20:00 horas, cunha charla-concerto de entrada libre e de acceso gratuíto

  “Con esta nova publicación recuperamos unha parte do noso patrimonio referente do Rexurdimento musical galego”, afirmou o secretario xeral de Cultura

Cultura e Dos Acordes recuperan o repertorio para piano do compositor histórico Juan Montes
[14/12/2016]
A Consellería de Cultura e a editorial Dos Acordes presentan o primeiro volume das obras para piano de Juan Montes, considerado un dos máximos expoñentes do Rexurdimento musical galego. A publicación recolle a música pianística do compositor lucense, nunha edición crítica de Joám Trillo que inclúe un estudo introdutorio asinado por Carlos Villanueva.

“Con esta nova obra –coeditada por Dos Acordes e pola Axencia Galega das Industrias Culturais (Agadic) na colección Ars Gallaeciae Musicae– recuperamos unha parte do noso patrimonio referente a unha época, finais do século XIX, que podemos considerar de rexurdir musical da cultura galega”. Así o asegurou esta mañá o secretario xeral de Cultura, Anxo Lorenzo, durante a rolda de prensa de presentación do volume, que tivo lugar no auditorio do Centro Galego de Arte Contemporánea (CGAC).
 
Ese mesmo escenario acollerá mañá xoves, ás 20:00 horas, unha charla-concerto sobre o libro, de acceso gratuíto e de entrada libre, que contará cunha contextualización a cargo dos profesores Villanueva e Trillo, e que rematará cun pequeno recital a cargo do pianista Javier Otero. Ao día seguinte, e á mesma hora, realizarase unha segunda charla-concerto na Casa do Saber, en Lugo, cidade natal “dun compositor do que temos aínda moita obra por recuperar e moitos aspectos biográficos por estudar”, recordou Anxo Lorenzo.
 
Recuperación e difusión da obra de Montes
“Para a Xunta de Galicia –concluíu o secretario xeral– é unha honra contribuír á difusión social destas partituras, que esperamos que se integren cada vez máis nos repertorios clásicos de Galicia e de calquera parte do mundo; porque cando a música ten interese, non ten fronteiras, e é a nosa obriga contribuír a que se coñeza, para que poida ser valorada, apreciada e tocada, que é o máximo recoñecemento que pode ter a creatividade musical”.
 
O profesor Joám Trillo foi o encargado de explicar na rolda de prensa o labor de acceso ás partituras –procedentes de arquivos da área de Lugo–, así como o seu traballo de revisión e edición, mentres que Carlos Villanueva, un dos maiores especialistas no patrimonio musical galego, ofreceu a súa visión sobre a figura de Montes. A intervención de Javier Jurado, director de Dos Acordes e coordinador editorial do volume, completou a presentación, que rematou cunha interpretación ao piano dunha das mazurcas de Juan Montes a cargo de Javier Otero.
 
Un referente do Rexurdimento musical galego
Juan Montes Capón (1840-1899) é, xunto con Marcial del Adalid e Pascual Veiga, un dos máximos expoñentes do Rexurdimento musical galego. A súa obra, máis popularizada polas súas baladas a partir de poemas galegos (como ‘Negra Sombra’, ‘Doce sono’ ou ‘As lixeiras anduriñas’), inclúe un importante volume de composicións relixiosas, corais, orquestrais e pianísticas aínda escasamente coñecidas mesmo entre o público galego.
 
Con este volume –o número 30 da serie Agra Vella dentro da colección Ars Gallaeciae Musicae, promovida por Dos Acordes e pola Agadic, na que viron a luz obras de Gaos, de Gustavo Freire, de Manuel Quiroga, e do mestre de capela compostelán José Vaquedano, entre outros– a Xunta de Galicia pretende contribuír á difusión da obra para piano e harmonio deste compositor lugués, maioritariamente aires bailables característicos do seu tempo, co obxectivo de facilitar a súa incorporación aos repertorios dos intérpretes actuais e de promover un maior coñecemento do patrimonio histórico musical de Galicia.

-Cartel dos concertos de prensentación