Cangas acolle mañá a penúltima representación da xira do Centro Dramático Galego con 'Tartufo'

  Tras a función que terá lugar ás 21.00 horas no Auditorio Municipal cangués, a versión galega do clásico de Molière concluirá o seu periplo o día 30 en Ferrol

  O galardoado Carles Alfaro dirixiu esta produción do CDG, que reflexiona sobre a impostura e a manipulación

 Cangas acolle mañá a penúltima representación da xira do Centro Dramático Galego con 'Tartufo'
[16/12/2016]
O Centro Dramático Galego enfronta a recta final da xira do espectáculo ‘Tartufo’, co que chegará mañá a Cangas para ofrecer a súa penúltima función. A representación está programada ás 21.00 h no Auditorio Municipal. O galardoado director valenciano Carles Alfaro é o responsable da posta en escena desta versión da comedia de Molière.

O elenco componse de nomes xa indiscutibles do noso teatro xunto a novos valores que están a iniciar a súa traxectoria nos escenarios: Casilda Alfaro, César Cambeiro, Antela Cid, Xoán Fórneas, Mónica García, Marta Lado, Roberto Leal, Rebeca Montero, Alejandro Saá e Patricia Torres.
 
Tamén forman parte desta produción Baltasar Patiño no deseño da escenografía, Diego Valeiras no do vestiario, Anxo Graña na composición musical, Trini F. Silva na caracterización, Loli Ramos na tradución, Roi V. Ponte no asesoramento lingüístico e Vanesa Sotelo na asistencia de dirección.
 
Reflexión desde a comedia
A elección deste clásico do teatro francés para abrir a nova temporada do CDG tivo moito que ver co feito de que o propio Molière fora actor e, como tal, primara o traballo interpretativo para reflexionar desde a comedia sobre os perigos da impostura e do artificio. Tanto no orixinal como nesta adaptación, ‘Tartufo’ pon o foco sobre aquelas persoas que posúen a capacidade de detectar as debilidades e vulnerabilidades dos demais para empregalas no seu beneficio, pero tamén sobre aquelas que se deixan manipular de xeito máis ou menos consciente.
 
Trátase, segundo o director Carles Alfaro, dunha proposta lúdica e lúcida, que busca reflectir os claros e escuros da obra orixinal e, ao tempo, ser fiel á ollada tenra, crítica e burlesca, tamén cara a si mesmo, que caracteriza o conxunto da obra de Molière.
 
Venda de entradas
A venda anticipada de entradas para a función de ‘Tartufo’ mañá en Cangas está operativa a través do web entradas.ataquilla.com. Tamén se poderán adquirir fisicamente nos horarios habituais do despacho de billetes do Auditorio.
 
‘Tartufo’, que se estreou o 23 de setembro en Santiago e puido verse tamén en Tui, A Coruña, O Barco de Valdeorras, Rianxo, Pontevedra, Vigo e Ourense, rematará a súa xira o 30 de decembro no Teatro Jofre de Ferrol.

-Máis información