O director xeral de contidos de Mediaset fala o venres no CGAI sobre xestión televisiva

  Manuel Villanueva protagoniza esta segunda sesión dos Parladoiros Audiovisuais, moderados por Antón Reixa dentro do programa de formación da Agadic Galicia ProFilme

  Reixa coordina tamén o ciclo 'Pensando en cine, pensando en Galicia', que este sábado acollerá o líder de Siniestro Total Julián Hernández para presentar o filme de culto ‘La matanza caníbal de los garrulos lisérgicos’

O director xeral de contidos de Mediaset fala o venres no CGAI sobre xestión televisiva
[21/03/2018]
Manuel Villanueva, director xeral de contidos de Mediaset España, estará o día 23 na sede do CGAI-Filmoteca de Galicia para ofrecer unha charla no marco do ciclo Parladoiros Audiovisuais, organizado pola Agadic dentro do programa Galicia ProFilme. Dirixida a profesionais e estudantes, a sesión comezará ás 12,00 h. e será de entrada libre.

Os asistentes terán a oportunidade de coñecer de primeira man a xestión de contidos de Tele 5, Cuatro e toda a oferta multicanal de Mediaset España. A permanencia do modelo de negocio da televisión xeneralista en aberto, a súa convivencia coa oferta en liña e de pagamento, as tendencias dos formatos de entretemento e a achega ás grellas televisivas do cine e a ficción de produción propia serán os eixos desta charla.

Nado en Marín, Manuel Villanueva atesoura unha longa e brillante experiencia na xestión de contidos en televisións públicas e privadas. Os seus primeiros pasos deunos na TVG, onde chegou a ser director de programas, para máis tarde ocuparse deste traballo en canles como Canal + ou Antena 3. Ocupa o seu posto de director xeral de contidos en Mediaset España dende o ano 2002, situando Tele 5 como a cadea televisiva líder en audiencia en España.

O cine galego en relación con outras artes
Antón Reixa é o coordinador e moderador desta iniciativa, así como do ciclo do CGAI Pensando en cine, pensando en Galicia, onde persoeiros da cultura galega non relacionados directamente coa sétima arte presentan e debaten co público filmes galegos da súa escolla.

Esta nova sección da filmoteca galega ofrecerá unha nova entrega este sábado, ás 18,00 h., coa participación do líder de Siniestro Total Julián Hernández para lembrar a súa intervención no filme de Antonio Blanco e Ricardo Llovo La matanza caníbal de los garrulos lisérgicos. Hernández encargouse de parte da banda sonora, tamén asinada por Os Diplomáticos de Monte Alto, ademais de contar cun destacado papel como actor.
Na película, un grupo de mozos volve dun concerto cando o seu coche pincha por mor duns cristais que hai na estrada e esnáfrase contra unha árbore. Piden axuda na casa máis próxima, onde os reciben os hospitalarios Machado. O que descoñecen estes rapaces é que os seus anfitrións teñen por lema “falta comida, sobra xente”.

Este filme de culto está considerado como un dos máis “cutres e noxentos”, mais á vez unha das máis divertidas incursións no xénero gore que se teñen feito en España. La matanza caníbal de los garrulos lisérgicos comercializouse directamente en VHS, en harmonía coa súa alma transgresora e independente, e a partir de aí foi construíndo a súa lenda cunha base de fans que mantiveron viva a película no tempo.

-Máis información sobre os Parladoiros Audiovisuais