O circo e a danza ocupan o Salón Teatro esta fin de semana coas propostas de Twisting the Balance e María Move

  ‘Futuro animal’ poderá verse en Santiago o venres 30 dentro da terceira edición do encontro D10! de formación e innovación no circo, organizado por Pistacatro

  O solo de coreografía e voz ‘Toda a beleza do mundo’ escenificarase na sede do Centro Dramático Galego o sábado 1 e o domingo 2 de decembro

O circo e a danza ocupan o Salón Teatro esta fin de semana coas propostas de Twisting the Balance e María Move
[28/11/2018]
O circo e a danza centrarán a programación desta fin de semana no Salón Teatro co espectáculo Futuro animal, de Twisting the Balance, e o solo coreográfico Toda a beleza do mundo, de María Move. O primeiro deles poderá verse no espazo do CDG este venres 30, ás 20,30 h., no marco do terceiro encontro de formación e innovación no circo D10!, organizado por Pistacatro.

A compañía da Xunta, que tamén colaborou con esta iniciativa no desenvolvemento do taller O actor de circo, por un adestramento creativo, impartido polo italiano Roberto Magro a pasada semana na Cidade da Cultura de Galicia, acolle agora na súa sede a última proposta da compañía internacional Twisting the Balance.
 
En Futuro animal, a idea de fábula como xénero de ficción serve de punto de partida para construír un “(auto)retrato” das características universais da natureza humana, cos seus vicios e os seus costumes. Así, a potencia social, discursiva e poética do circo contemporáneo ponse ao servizo dunha visión distópica do futuro, no que os seres humanos están transformando voluntariamente os seus corpos nos de animais.
 
Osperformers Leire Mesa e Edoardo María Virtú son os encargados de poñer en escena os diferentes números circenses desde espectáculo, con dirección e dramaturxia de Rolando San Martín, que chega a Santiago despois de ser representado en diferentes escenarios do resto de España, Suecia e Croacia.
 
Coreografía e voz
A continuación, a creadora leonesa afincada en Galicia María Move subirá ao escenario do Salón Teatro co seu solo de danza e voz Toda a beleza do mundo, do que ofrecerá funcións o sábado 1 de decembro, ás 20,30 h., e o domingo 2, ás 18,00 h.
 
Nesta proposta, o movemento expresa emocións puras e a danza amósase como un proceso ligado á nosa orixe e ao noso percorrido biográfico, mentres o son, a luz e o corpo viaxan a través do tempo. Neste sentido, ofréceselle ao público un percorrido que mestura as danzas tradicionais e os ritmos do corpo percutindo a terra coa danza contemporánea, a voz e o canto da intérprete.
 
A venda anticipada para ambos os espectáculos xa está dispoñible no web entradas.abanca.com e no teléfono 902 434 443. Os días de función, o despacho de billetes do teatro estará aberto desde dúas horas antes do inicio da representación.

-Futuro animal no web do CDG
-Toda a beleza do mundo no web do CDG