'Trote', primeira longametraxe de Xacio Baño, estréase mañá nunha ducia de salas de toda Galicia

  A Xunta apoiou con máis de 250.000 euros a película da compañía galega Frida Films a través dos programas de subvencións da Agadic para a escrita de guións, produción audiovisual e promoción en festivais de prestixio internacional

  María Vázquez e Celso Bugallo protagonizan esta fita sobre a loita entre a razón e o instinto animal, que chega ao circuíto comercial tras as súas seleccións nos festivais de Locarno e San Sebastián

 'Trote', primeira longametraxe de Xacio Baño, estréase mañá nunha ducia de salas de toda Galicia
[13/12/2018]
Trote, a primeira longametraxe do realizador galego Xacio Baño, estréase mañá venres nas salas de cinema tras o seu paso polos festivais internacionais de Locarno, en Suíza, e de San Sebastián. O filme, producido pola compañía galega Frida Films, chega agora ao circuíto comercial como parte da carteleira dunha ducia de cines galegos e doutros sete do resto de España.

O salto de Xacio Baño á longametraxe, tras unha recoñecida traxectoria internacional como curtametraxista, contou co apoio económico da Xunta en diferentes convocatorias do programa de axudas ao sector que xestiona a Axencia Galega das Industrias Culturais (Agadic). Así o explicou hoxe o seu director, Jacobo Sutil, quen lembrou que xa en 2014 o realizador recibiu unha primeira achega para a escrita do guión de Trote a través da liña de axudas para a promoción do talento audiovisual galego.
 
Cine galego e en galego 
Dous anos despois, Frida Films resultou adxudicataria de máis de 250.000 euros para a rodaxe de Trote, en coprodución coa compañía lituana M-Films, e este mesmo ano 2018, a Agadic apoiou a súa estrea internacional en Locarno e a súa proxección na sección Zabaltegui de San Sebastián mediante a convocatoria para a difusión do cine galego en festivais e mostras de prestixio fóra da nosa Comunidade. Coa súa selección en ambos certames, a ópera prima do director de Xove converteuse, ademais, na primeira película en galego que participou nun mesmo ano nas seccións competitivas de dous festivais de cine de clase A.
 
Jacobo Sutil acompañou a Xacio Baño, a actriz María Vázquez e o produtor Sergio Frade na presentación aos medios da estrea comercial de Trote, que poderá verse desde mañá na Coruña (Cantones Cines), Ferrol (Cine Dúplex), Lugo (Códex Cine), Santiago (Númax e Cines Compostela), Vigo (Multicines Norte), O Barco de Valdeorras (Casa da Cultura), Caldas de Reis (Avenida), A Estrada (Cine Central), Marín (Cine Seixo), Verín (Casa da Cultura) e Viveiro (Cines Viveiro), así como en varias salas de Madrid, Barcelona, Málaga ou o País Vasco.
 
Trote, que o Festival de San Sebastián xa seleccionara en 2016 para o seu programa de residencias Ikusmira Berriak, xira arredor da personaxe interpretada por María Vázquez, quen lle da vida a unha muller atrapada no ambiente opresivo da súa familia e da pequena aldea do interior de Galicia na que vive. Como na Rapa das Bestas, celebración durante a que transcorre esta historia, o filme reflicte a loita entre o home e o cabalo, ao tempo que entre a razón e o instinto.
 
En palabras do responsable da Agadic, esta primeira longa de Xacio Baño reúne moitos elementos que “multiplican o seu valor e o reverten na nosa terra e nos nosos profesionais”. Entre eles, “un director galego, que avanza deste xeito na súa carreira, e un reparto de actrices e actores do país –ademais de María Vázquez, Celso Bugallo, Diego Anido, Tamara Canosa ou Federico Pérez, entre outros– que defende con calidade interpretativa un guión en clave galega, pero de validez universal, do que é coautor outro talento da nosa escrita como é Diego Ameixeiras”, destacou.
 
Para Sutil, esta película identifica moi ben o audiovisual galego como un “sistema propio, diferenciado, que fala de nós sendo quen, á vez, de acadar proxección exterior”. De feito, Trote está rodada integramente en galego e así está a ser distribuída fóra da nosa Comunidade. Ademais, a historia transcorre en localizacións que, como o curro de Amil, en Moraña, durante a rapa das bestas, combinan unha forte carga simbólica e cultural co atractivo para o público foráneo.