A Xunta promove o novo catálogo 'Shorts from Galicia' no festival internacional de curtametraxes de Clermont-Ferrand

  Comeza a difusión exterior desta escolma no mercado do prestixioso encontro francés, onde a curta de animación ‘Soy una tumba’, de Khris Cembe, compite na sección internacional

  Ademais deste título, tamén figuran na publicación da Agadic ‘Maullidos de látex’, de Brian Rodríguez; ‘Limbo’, de Daniel Viqueira; ‘A nena azul’, de Sandra Sánchez; ‘La noche’, de Martín Romero; e ‘El Espectrorium’, de Judith Adataberna

A Xunta promove o novo catálogo 'Shorts from Galicia' no festival internacional de curtametraxes de Clermont-Ferrand
[04/02/2019]
A Xunta de Galicia inicia hoxe a difusión exterior do seu catálogo Shorts from Galicia 2019 no Festival de Court Métrage de Clermont-Ferrand (Francia), o principal encontro internacional para os profesionais que se dedican á produción, difusión e distribución de curtametraxes. Realizada pola Axencia Galega das Industrias Culturais (Agadic), a pubicación ofrece na súa nova edición unha escolma de seis títulos: Maullidos de látex, de Brian Rodríguez; Limbo, de Daniel Viqueira; Soy una tumba, de Khris Cembe; A nena azul, de Sandra Sánchez; La noche, de Martín Romero; e El Espectrorum, de Judith Adataberna.

Ademais, a curta de animaciónSoy una tumba foi seleccionada polo festival de Clemont-Ferrand para competir dentro da súa sección internacional. O traballo de Cembe súmase, así, a destacada listaxe de traballos galegos que competiron nos últimos tempos por algúns dos premios da mostra francesa, como Matria, de Álvaro Gago, en 2018; Decorado, de Alberto Vázquez, en 2017; ou Ser e voltar, de Xacio Baño, en 2015.
 
Como en anos anteriores, Shorts from Galicia –a marca da Xunta para a difusión das curtametraxes galegas– estará presente na 34ª edición do mercado profesional asociado ao festival, que se desenvolve desde hoxe e ata o vindeiro xoves 7. O audiovisual galego acode a este Marché du Film Court dentro do espazo xeral Shorts from Spain, coordinado polo Instituto de la Cinematografía y de las Artes Audiovisuales (ICAA). Del forman parte tamén outros organismos autonómicos e entidades de Andalucía, Aragón Canarias, Cantabria, Castela e León, Cataluña, Comunidade Valenciana, Estremadura, Madrid e País Vasco, ademais de varias das principais distribuidoras españolas no ámbito das curtametraxes.
 
Publicación e vídeo promocional
Desde este espazo estase a difundir entre os profesionais acreditados (representantes de produtoras, distribuidoras, televisións, festivais e axentes de vendas internacionais) tanto a nova edición do catálogo Shorts from Galicia, así como o vídeo promocional de 2019. As seis curtametraxes que lle dan forma foron elixidas por unha comisión especializada tras unha convocatoria pública aberta pola Agadic, á que se presentaron unha trintena de traballos de realizadores galegos. Seguindo un criterio artístico, a través desta escolma búscase dar conta do bo momento creativo do noso audiovisual.
 
O de Clermont-Ferrand é o primeiro dos encontros profesionais nos que o cinema galego conta con representación este ano no marco do programa de internacionalización desenvolvido pola Consellería de Cultura e Turismo, a través da Agadic. A seguinte cita deste calendario será o European Film Market de Berlín (Alemaña), que se celebrará a partir deste xoves en paralelo á Berlinale.