O novo proxecto abre a temporada escénica 2022-2023 da unidade teatral da Xunta

O Centro Dramático Galego e Ainé Producións unen teatro e xornalismo para afondar na cara oculta do fútbol na obra 'Recortes, caneos e outras formas de driblar'

  Os directores de Industrias Culturais e do CDG participaron na presentación levada a cabo nun campo deportivo xunto con todo o equipo da montaxe que se estreará o 29 de setembro en Santiago de Compostela

  O espectáculo, dirixido por Tito Asorey con dramaturxia de José L. Prieto, leva a escena un libro aínda inédito de Nacho Carretero sobre os recantos ocultos, as dobreces e as emocións que arrodean o deporte rei

  Xosé A. Touriñán, Manuel Cortés, Christian Escuredo, Xoán Fórneas, Isabel Garrido e Sergio Zearreta conforman o elenco da peza, que se representará no Salón Teatro ata o 23 de outubro para xirar logo por distintos escenarios

O Centro Dramático Galego e Ainé Producións unen teatro e xornalismo para afondar na cara oculta do fútbol na obra 'Recortes, caneos e outras formas de driblar'
[20/09/2022]
O Centro Dramático Galego, unidade teatral da Xunta de Galicia, e Ainé Producións estrearán o próximo 29 de setembro no Salón Teatro de Santiago de Compostela Recortes, caneos e outras formas de driblar, espectáculo que abordará tanto a dimensión visible como a cara oculta do mundo do fútbol. O espectáculo mestura xornalismo, deporte e teatro nunha proposta escénica que xorde dun libro aínda inédito de Nacho Carretero. Tito Asorey será o responsable de dirixir a peza, que conta coa dramaturxia de José L. Prieto.

O director da Axencia Galega das Industrias Culturais, Jacobo Sutil, e o do CDG, Fran Núñez, participaron esta mañá no campo de fútbol do Villestro (Roxos) na presentación da obra xunto ao equipo artístico e de produción deste novo proxecto que abre a temporada escénica 2022-2023 da compañía institucional galega. Pisaron tamén o céspede Asorey, Prieto e Carretero, así como o representante de Ainé Álvaro Pérez Becerra e o elenco, formado por seis intérpretes: Xosé A. Touriñán,, Manuel Cortés, Christian Escuredo, Xoán Fórneas, Isabel Garrido e Sergio Zearreta
 
Proposta lúdica e crítica
Recortes, caneos e outros formas de driblar, que permanecerá no Salón Teatro de Santiago de Compostela ata o 23 de outubro para logo xirar ata febreiro por outros escenarios. aborda o fútbol dende múltiples perspectivas. Así, achegará a través dun de tantos partidos un retrato escénico dosprotagonistas, dos secundarios e mais dos figurantes que participan no grande espectáculo futbolístico: xogadores, adestradores, xornalistas, árbitros, directivos e seareiros. 
 
A peza propón desde a escena un traxecto lúdico, crítico e musical polo complexo mundo que arrodea a este gran deporte de masas, no que conflúen emocións individuais e sentimentos colectivos de pertenza, mais tamén todo tipo de intereses: económicos, deportivos, sociais, televisivos, etc. Un traxecto que percorrerá este deporte polo dereito e polo envés, xa que se achegará unha visión en conxunto da dimensión público e de todo aquilo que está lonxe dos focos: o que acontece nos vestiarios, o que se negocia nos despachos, o que se comenta nos palcos. Tamén, incluso, o que lle pasa pola cabeza aos protagonistas.
 
O equipo artístico deste espectáculo complétase con Vadim Yukhnevich ao cargo das composicións musicais, José Faro Coti asinando a escenografía, Laura Iturralde como responsable da iluminación e mais dos audiovisuais, Laura Baena á fronte do vestiario e Sara Rey na axudantía da dirección.
 
Calendario e venda de entradas
Recortes, caneos e outras formas de driblarofrecerá representacións de mércores a domingo durante as case catro semanas que estará no Salón Teatro. Seguindo a política de accesibilidade para todos os públicos posta en marcha polo Centro Dramático, as funcións serán inclusivas, con apoio en lingua de signos e materias especiais para a súa percepción. Haberá tamén  sesións descontraídas, que se desenvolven nunha atmosfera acolledora e con máis tolerancia ao ruído e ao movemento no patio de butacas, formuladas para aquelas persoas cunha especial sensibilidade ou con necesidades sensorias específicas para a escoita e mais a comunicación.
 
As entradas para Santiago de Compostela xa están a venda dende hoxe mesmo, a través da plataforma dixital Ataquilla.com e da web recortes.gal. No despacho de billetes do Salón Teatro, poderanse adquirir nos días das funcións dende dúas horas antes do seu inicio.
 
O primeiro destino da xira será Pazo da Cultura de Carballo para clausurar o Festival Internacional Outono de Teatro-FIOT o 31 de outubro, ao que seguirán o Auditorio Municipal de Ourense (4 e 5 de novembro), o Teatro AFundación de Vigo (11, 12 e 13 de novembro), o Pazo da Cultura de Narón (25 e 26 de novembro), o Auditorio Sede Afundación de Pontevedra (10 e 11 de decembro), o Auditorio Municipal dde Cangas (23 de decembro), a Casa da Cultura de Burela (7 e 8 de xaneiro), o Auditorio Gustavo Freire de Lugo (13 e 14 de xaneiro), o Auditorio Municipal de Vilagarcía de Arousa (20 e 21 de xaneiro), o Teatro Colón da Coruña (26, 27 e 28 de xaneiro) e o Auditorio Municipal de Ferrol (3 e 4 de febreiro).
 
Tres producións na temporada
Esta montaxe do Centro Dramático Galego e Ainé Producións será o primeiro espectáculo que se estree durante a temporada 2022/2023 da unidade de produción teatral dependente da Consellería de Cultura, Educación, FP e Universidades. As outras dúas propostas son Shakespeare en Roma, con catro equipos de dirección, e Un hotel de primeira sobre o río, que leva a escena o texto de Xohana Torres codirixido por Gonçalo Guerreiro e María Torres. 
 
Con este trío de producións, que representan un investimento superior aos 600.000 euros, contrataranse 18 intérpretes durante un novo período de actividade no que se continuará apostando pola pluralidade de estilos e formatos. A previsión é realizar 110 funcións en total, cun modelo de distribución diferente para cada montaxe, cos obxectivos de chegar á maior cantidade de público posible e de crear novas audiencias.

-Dosier do espectáculo

-Noticia na web do CDG