Fernández-Tapias salienta a iniciativa social do festival de cine inclusivo de Vigo, que lle rende homenaxe póstumo ao director Roberto Pérez Toledo

  A delegada da Xunta en Vigo participou este luns na presentacion do certame cinematográfico que arranca cunha retrospectiva do cineasta canario

  O Cine Salesianos, o MARCO e o Auditorio Municipal acollerán esta semana a proxección dun total de 47 fitas

Fernández-Tapias salienta a iniciativa social do festival de cine inclusivo de Vigo, que lle rende homenaxe póstumo ao director Roberto Pérez Toledo
[17/10/2022]
A delegada territorial da Xunta de Galicia en Vigo, Marta Fernández-Tapias, participou este luns na presentación do VII Festival de Cine Inclusivo de Vigo que se abre este martes no Auditorio Municipal cunha retrospectiva do director canario Roberto Pérez Toledo. “Xa sodes unha referencia en moi pouco tempo e todo iso cun obxectivo social como é o de dar a coñecer, apoiar e valorar proxectos cinematográficos realizados por e para a inclusión, a igualdade e a difusión universal da sétima arte”, sinalou a representante autonómica durante o acto de inauguración celebrado no Cine Salesianos.

O certame comeza este martes e finaliza o sábado 22 tras a proxección de 47 pezas audiovisuais en tres emprazamentos diferentes: o Auditorio Municipal, o Museo MARCO e o Cine Salesianos. As proxeccións divídense en catro categorías a concurso e todas elas son de acceso libre ata completar aforo.

A cita, que forma parte da listaxe de festivais audiovisuais subvencionados pola Consellería de Cultura, Educación, FP e Universidades, a través da convocatoria anual da Agadic (Axencia Galega das Industrias Culturais), conta cunha importante presenza do cinema galego nas súas diferentes seccións.

Ademais, o certame tamén servirá para presentar o documental autobiográfico de Gonzalo Suárez, co-director do festival, que conta como entrar no equipo de balonceso Amfiv cambioulle a vida, despois de quedar en cadeiras de rodas por un accidente.

No acto inaugural do festival, proxectaranse dous filmes do director Roberto Pérez Toledo: ‘Seis puntos sobre Emma’ (2011) e ‘Lugares a los que nunca hemos ido’ (2021) e se lle fará entrega, a título póstumo, do premio honorífico do festival ao director canario. Pérez Toledo, que faleceu este ano, quedou aos 14 anos en cadeira de rodas e é unha referencia do cine comprometido coa defensa dos dereitos da comunidade LGTBI+.

Web do Festival de Cine Inclusivo de Vigo