O filme subvencionado pola Xunta 'María Solinha' estréase cun plan inédito de exhibición en formato de cine de rúa e autocine

  O director da Agadic participou na presentación da nova longametraxe de Ignacio Vilar, para a que a produtora Vía Láctea Filmes resultou adxudicataria dunha axuda de máis de 195.000 euros

  A película foi rodada maioritariamente en diferentes localizacións de Redondela e Cangas, que acollerán tamén as súas primeiras proxeccións públicas o venres 19 e o sábado 20, respectivamente

O filme subvencionado pola Xunta 'María Solinha' estréase cun plan inédito de exhibición en formato de cine de rúa e autocine
[12/06/2020]
María Solinha, o novo filme do realizador Ignacio Vilar, chegará á pantalla grande a partir da semana que vén como inicio dun innovador percorrido de estreas en formato de cine de rúa e autocine por diferentes localidades galegas, así como de Castela e León e Portugal. O seu equipo explicouno hoxe na presentación organizada no Auditorio de Cangas pola produtora Vía Láctea Filmes, que contou para a súa materialización cunha achega económica por parte da Xunta de Galicia de 195.171 euros a través da convocatoria de subvencións a producións e coproducións audiovisuais de 2019.

Redondela e Cangas acolleron gran parte da rodaxe do filme durante o pasado verán e serán tamén o escenario das súas dúas primeiras proxeccións públicas os días 19 e 20 de xuño, respectivamente, para as que se contará coa presenza das súas actrices protagonistas, Grial Montes e Laura Míguez, así como do seu director e doutros destacados integrantes do elenco, como Santi Prego, Antonio Durán "Morris" e Mabel Rivera.
 
A xira de Maria Solinha continuará desenvolvéndose ata o mes de outubro por diferentes localidades que non dispoñen de sala de cine comercial e onde se levarán a cabo proxeccións ao aire libre, nas que se garantirá tanto as mellores condicións técnicas para a súa exhibición como o control de capacidade e todas as medidas hixiénico-sanitarias necesarias. A seguinte cita co filme será no autocine de Verín, onde o 21 de xuño se celebrará un pase solidario a favor das familias con menos recursos afectadas pola pandemia do Covid-19. 
 
Valor engadido á estrea
Deste xeito, Vía Láctea Filmes modificou o seu plan de estrea en salas convencionais, previsto inicialmente para o pasado mes de maio, para se adaptar ao novo contexto provocado polo Covid-19. Na presentación que tivo lugar este mediodía, o director da Axencia Galega das Industrias Culturais (Agadic), Jacobo Sutil, subliñou precisamente esta capacidade de reacción do equipo de Ignacio Vilar para "facer da necesidade virtude" e deseñar un plan inicial de distribución en formato de cine de rúa e autocines, totamente innovador en Galicia, perfectamnete compatible cos protocolos sanitarios e que, "lonxe de mermarlle valor á estrea, a dota de maior relevancia e penetración social".
 
O responsable da Agadic acompañou o director e o equipo de Maria Solinha neste acto, no que tamén interviñeron Carmela Silva, presidenta da Deputación de Pontevedra; Xosé Manuel Pazos, alcalde de Cangas, e Digna Rivas, alcaldesa de Redondela, ademais dos representantes do resto de entidades colaboradoras. A fita contou tamén coa implicación da TVG na produción.
 
Sutil subliñou igualmente os valores artísticos do novo traballo de Igancio Vilar: "Unha longametraxe galega, rodada en galego e integramente en localizacións galegas, cunha temática que afonda na nosa cultura, pero levándoa a categorías universais que a fan susceptible de proxección exterior, e que aborda dun xeito distinto, establendo paralelismos entre o pasado e presente, aspectos en permanente atención como a situación da muller, a desigualdade ou a inxustiza social", asegurou.
       
A historia que narra este filme arranca cando un afamado director de teatro chega a Cangas para reconstruír a lenda de María Solinha, unha viúva rica acusada de bruxería pola Inquisición a principios do século XVII. Os seus intérpretes serán os propios veciños da comarca, que se embarcan nesta aventura con paixón. Mais o teatro e a realidade comezarán a mesturarse de tal maneira que as protagonistas chegarán a experimentar nas súas carnes os ecos da agresión que sufriu a María Solinha orixinal.