A Xunta leva aos centros educativos unha emisiˇn especial en li˝a de 'O charco de Ulises', a ˙ltima produciˇn do CDG

  A través dunha emisión en liña, o alumnado galego poderá gozar dunha versión especial da adaptación do clásico grego dirixida por Marián Bañobre e Santiago Cortegoso, estreada pola compañía pública o pasado xaneiro

  A iniciativa desenvolverase o 26 de marzo, co gallo da conmemoración o sábado 27 do Día Internacional do Teatro, para motivar os máis novos a asistir ás funcións da xira prevista para finais de ano

A Xunta leva aos centros educativos unha emisiˇn especial en li˝a de 'O charco de Ulises', a ˙ltima produciˇn do CDG
[08/02/2021]
A Consellería de Cultura, Educación e Universidade levará o venres 26 de marzo a última produción do Centro Dramático Galego (CDG), O charco de Ulises,aos centros educativos, co gallo da conmemoración o sábado 27 do Día Internacional do Teatro. A través dunha conexión que se facilitará xunto co convite, o alumnado de 3º e 4º da ESO e de Bacharelato poderá gozar da adaptación do clásico grego dirixida por Marián Bañobre e Santiago Cortegoso que foi estreada pola compañía pública o pasado xaneiro.


A iniciativa enmárcase na aposta que está a facer a Xunta para achegarlle o teatro ao estudantado galego, ante as restricións de mobilidade e a suspensión das exhibicións por mor da covid-19.
 
Así, o CDG emitirá unha versión especial do espectáculo para adaptarse á organización dos centros de ensino e á linguaxe audiovisual. A exhibición en liña completarase cun coloquio no que participarán membros do equipo artístico e unha mostra do proceso de creación do espectáculo. Trátase, deste xeito, de motivar os máis novos a asistir ás funcións de O charco de Ulises que percorrerán Galicia na xira prevista para finais deste ano e coas que poderán gozar en vivo da representación nos escenarios.
 
Con esta actividade, a Consellería de Cultura, Educación e Universidade busca promover a máxima interacción entre a realidade educativa e a das artes escénicas. Neste sentido, cómpre salientar que a Xunta está a desenvolver tamén o programa de visitas en liña para centros educativos Os segredos do Salón Teatro, no que o director do CDG, Fran Núñez, guía os participantes polas instalacións do edificio da súa sede escénica cunha explicación dos diferentes oficios que conflúen para facer posible cada representación.
 
Para a compañía teatral pública, a iniciativa dálle continuidade ao seu programa de difusión en liña, inaugurado o pasado 24 de xaneiro con O charco de Ulises e en colaboración coa Secretaría Xeral da Emigración da Xunta, nunha emisión que acadou 800 conexións desde 18 países en catro continentes.
 
O clásico homérico e a emigración galega
O charco de Ulises sitúa o clásico de Homero nun contexto transatlántico. A trama do texto, escrito por Cortegoso en 2010 dentro do programa Iberescena e nos talleres de dramaturxia do CDG, discorre en paralelo á Odisea, xerando un diálogo co mito orixinal para tratar o fenómeno da emigración galega cun marcado compoñente poético. Así, a proposta muda Ítaca por Galicia, Troia por Bos Aires e o Mediterráneo polo Atlántico.
 
Fran Paredes e Inés Salvado encarnan os papeis de Ulises e Penélope, encabezando un elenco que completan Óscar Allo, Miguel Borines, Mónica Camaño, Rosalía Castro, Raquel Espada, Manuel Millán, Chusa Pérez de Vallejo e Paulo Serantes, ademais do músico Xosé Lois Romero. No equipo artístico figuran Pablo Giráldez ‘O Pastor’ no deseño da escenografía, Saturna no de vestiario, Salvador del Río na iluminación, Xosé Lois Romero no espazo sonoro, Ezequiel Merlo na Coreografía Tango, María Costas no traballo de voz, Baia Fernández na caracterización, Carmela Bueno na asistencia de dirección e Xandre Vázquez na de produción.

-O charco de Ulises