A Mostra Primavera enDanza de Carballo ofrece seis espectáculos a través da Rede Galega de Teatros e Auditorios
Desenvolverase no Pazo da Cultura do 12 e o 30 de abril coas producións galegas de Marcia Vázquez, Paula Quintas Cía e Nova Galega de Danza, e as propostas estatais de La Coja Dansa, Miguel Barrero y La Pequeña Victoria Cen, e Led Silhouette
A Mostra Primavera enDanza de Carballo celebrará a súa 22ª edición do 12 ao 30 de abril cunha carteleira que inclúe seis citas coreográficas programadas a través da Rede Galega de Teatros e Auditorios, o circuíto de espectáculos que a Xunta de Galicia promove en colaboración coas entidades xestoras dos seus 41 espazos asociados.
A carteleira preparada para o ciclo está conformada por Vaivén, peza unipersoal de Marcia Vázquez, programada para o día 12 de abril; Multiperspectivas #2, de Paula Quintas Cía., o día 13; Berro, montaxe de celebración do vixésimo aniversario de Nova Galega de Danza, o día 20; El cuento de Persépolis, da agrupación valenciana La Coja Dansa, o 21; Disculpa si te presento como que no te conozco, da compañía de danza e circo Miguel Barrero y La Pequeña Victoria Cen, con sede en León, o 26; e Los perros, dos navarros Led Silhouette, o 30 de abril.
O programa completo da Mostra Primavera en Danza, que inclúe tamén diferentes actividades complementarias de achegamento á danza contemporánea como estratexia de afianzamento de públicos, foi detallado hoxe na presentación na que participou o director da Axencia Galega das Industrias Culturais, Jacobo Sutil, xunto aos responsables municipais e representantes dalgunhas das compañías en cartel.
Producións galegas
Na súa intervención, Jacobo Sutil situou esta iniciativa entre os programas pioneiros en Galicia á hora de fidelizar un público para a danza, ademais de destacar o seu valor de promoción para os artistas e compañías que se dedican a esta disciplina na nosa Comunidade. Neste sentido, subliñou a calidade dos tres espectáculos de produción galega contratados para a mostra a través da oferta da Rede Galega de Teatros e Auditorios: Vaivén, Multiperspectivas #2 e Berro.
O representante da Consellería de Cultura, Educación, FP e Universidades, referiuse especificamente a esta última montaxe, presentada por Nova Galega de Danza, para incidir no elevado nivel e na diversidade do traballo que se está a facer dentro deste ámbito escénico: “Trátase dunha aposta de grande formato, nacida en Galicia, pero coa participación internacional do prestixioso coreógrafo Sharon Fridman, asinando a dirección artística e con música do carballés Sergio Moure de Oteyza”, afirmou. Tamén lembrou que Nova Galega de Danza é a adxudicataria da maior coprodución que se acometerá este ano a través do Centro Coreográfico Galego para o espectáculo Dique, que se estreará o vindeiro 21 de xuño no Salón Teatro de Santiago de Compostela.
Así mesmo, destacou o traballo realizado na creación de novos públicos, que no caso da programación do ciclo carballés se traduce na función do domingo 21 de abril coa proposta El cuento de Persépolis, de La Coja Dansa, incluído coa intención de achegarlle esta disciplina á cativada e incorporala dentro das súas dinámicas culturais.
Axudas plurianuais para as compañías de danza
O director de Industrias Culturais sinalou, ademais, a importancia da convocatoria de axudas da Xunta á creación escénica lanzada a comezos de ano, que lle dedica 100.000 euros ao financiamento de espectáculos de danza e que introduce novos criterios orientados a converxer cos obxectivos do Plan Integral para a Danza de Galicia, permitindo que as compañías podan optar á axuda plurianual. Así, a cifra de facturación media nos tres últimos anos rebáixase en 40.000 euros respecto ao resto de xéneros e establécese que os proxectos deberán conter, cando menos, unha produción e un plan de xira de 50 funcións (10 delas correspondentes a unha das producións do proxecto subvencionado) que contemple tanto o mercado galego como o exterior.
Imaxes relacionadas
